CEBU, Philippines - Gitabangan sa pagbunlot sa kapolisan sa lungsod sa Liloan ang naghubo nga kawatan nga nadakpan diha’ng nipasok ilawom sa katre sulod sa lawak sa panimalay sa usa ka negosyante’ng babaye sa sitio Looc, Calero, Liloan alas 12 pasado kagahapon sa tungang gabii.
Si Senior Police Officer 2 Bryan Batiquin sa Liloan Police Station niila sa nadakpan nga si Reynante Auman Pilapil, 32-anyos, ulitawo ug habal-habal drayber nga taga sitio Camote, Calero.
Matud ni Batiquin nga si Rose Marie Fabunan, 34-anyos, dalaga nga nanag-iya og usa ka sari-sari store sa merkado publiko sa lungsod, niingon nga upat na ka higayun nga gisaka sa kawatan ang iya’ng panimalay.
Kini ang hinungdan nga didto na siya magkatulganan sa pikas nga panimalay sa panahon sa gabii ug ang mga silingan ang nagbantay niini.
Giangkon sa dinakpan nga naibog siya sa biktima hinungdan nga kanunay siya’ng mobalik sa pagsulod sa panimalay ug maghubo na daan.
Nakasulod ang suspek pinaagi sa pagguba sa pultahan sa panimalay ug gisulod ang lawak diin didto gikuha ang mga mahalong gamit lakip sa cellphone.
Ang mga silingan nga nakamatikod sa pagsulod sa suspek ang dali nga nanawag sa buhatan sa kapolisan ug kuyog sa mga barangay tanod sa ila’ng pagtubag sa alarma.
Ang suspek nipasok ilawom sa kama apan nigimaw ang tiil hinungdan nga gitabangan og bunlot sa mga polis sa pagpagawas.
Nagtuo ang kapolisan nga tiggamitan og ilegal nga drugas ang suspek ug daw wala na kini sa iya’ng kaugalingon diha’ng ila’ng nadakpan nga hubo ang tibuok lawas. (BANAT NEWS)