CEBU, Philippines - Naghinuktok sulod sa selda sa Waterfront Police Station ang 37-anyos nga lalaki nga giingong nangawat og pito ka kutsara sulod sa Jollibee sa dalan Colon, dakbayan sa Sugbo pasado alas 7 kagahapon sa buntag. Ang dinakpan naila nga si Edwin dela Rosa, minyo nga taga Private, Sambag I.
Matud ni Senior Police Officer 1 Aaron Pescadero, desk officer sa Waterfront Police Station, nga nahinabi sa Banat News nga niabot sa kan-anan ang suspek kay gusto’ng mo-inom og tubig ug mogamit sa kasilyas.
Apan nabantayan sa guwardiya nga si Joel Monares nga dunay kutsara nga gisulod ni dela Rosa sa bulsa.
Sa pagpakighinabi sa mga tigbalita sa dinakpan kini niingon nga napugos siya og kuha sa mga kutsara gumikan kay wala na’y kutsara sa iya’ng balay kay gipanglabay sa gagmay’ng anak.
Gihimakak sa dinakpan nga iya’ng ibaligya ang mga kutsara.
Hinuon pasado alas 4 kagahapon sa hapon gibuhian ra sa kapolisan si dela Rosa human nga dili interesado ang tagdumala sa kan-anan nga mopasaka og kaso batok sa suspek. (BANAT NEWS)