CEBU, Philippines - Pagpasirado sa One Citi Link Terminal sa N. Bacalso Avenue sa Cebu City nakahasol sa mga van for hires ug sa mga pasahero nga magbiyahian ngadto sa siyudad sa Toledo ug sa Pinamungajan.
Matud ni Andy Sabellon usa sa mga miyembro sa kahugpungan sa mga V-hire drivers ug operators sa dakbayan sa Toledo nahasol sila karong gibalhin sila sa Tabo-an Public Market sa Sugbo.
Nabalaka si Sabellon nga momenos ang ilang mga pasahero tungod niini. Samtang ang pasahero nga si Mary Ann Santi wala makauyon tungod kay matud pa tuyuon ang nahimutangan sa bag-ong terminal ug lisod alang niadtong dunay mga kargamento.
Nasayran nga adunay dili momenos 300 ka mga V-hires gikan sa Toledo ug Pinamungajan ang nagbiyahian sa One Citi Link Terminal gawas pa sa ubang mga pasaheroan nga mobiyahe ngadto sa habagatan ug kasadpang bahin sa probinsya sa Sugbo.
Gipasiradohan ni Cebu City Mayor Michael Rama ang terminal tungod sa kapakyas sa management pagbayad sa obligasyon niini sa buhis nga nagbalor sa kapin P12 milyones ug pag-operate nga walay mayor’s permit. (BANAT NEWS)