CEBU, Philippines - Ang Provincial Disaster Risk Reduction and Management Office (PDRRMO), Cebu City ug Mandaue City nangandam sa bagyong Chedeng.
Si Baltazar Tribunalo, hepe sa PDRRMO mibutyag nga higpit sila karong nag-monitor sa bagyo subay sa mando ni Gobernador Hilario Davide III.
Gibutyag usab ni Tribunalo nga nagdugang sila og pundo ug mga pagkaon nga alang sa mga hinabang sa mga maapektohan sa katalagman samtang mahimo nilang ipatawag dayon ang emergency response team.
Base sa weather advisory no. 4 sa PAGASA mga alas 10:00 sa buntag kagahapon ang mata sa bagyong Chedeng nahimutang kini sa 1,280 kilometers (km) sa sidlakang bahin sa Guian, Eastern Samar.
Si Chedeng dunay gikusgon sa hangin nga 215 kilometer per hour (kph) duol sa sentro niini ug 250 kph ang gikusgon sa unos. Ang bagyo nag-irog kini sa kasadpan amihanang kasadpan sa gikusgon nga 17 kph ug gipaabot nga mosulod sa Philippine Area of Responsibility (PAR) kagahapon sa gabii o karong buntag (Huwebes).
Samtang si Mandaue City Disaster Officer Felix Suico mibutyag nga naandam na sa siyudad ang ilang kinahanglanon sa pagtubag sa emerhensiya sa higayon nga mosud ang bagyong Chedeng.
Sa laing bahin, bisan dili direktang maigo ang siyudad sa Sugbo sa bagyong Chedeng, nangandam na karon ang Cebu City Disaster Risk Reduction and Management Council kon CCDRRMC.
Matud ni City Councilor David Tumulak gibutang na sa alpha alert status ang mga disaster teams sa siyudad lakip ang mga barangay volunteers. (BANAT NEWS)