CEBU, Philippines – Gibana-bana nga karong Miyerkules mosulod sa Philippine Area of Responsibility ang bagyo’ng Chedeng nga adunay international name nga Maysak.
Kini ang hinungdan nga posible’ng makasinati og mga panagsang pag-uwan ang Luzon, Kabisay-an ug ubang parte sa Mindanao atol sa pagtimaan sa Semana Santa. Sa pagsuwat ni’ng balita ang bagyo’ng Chedeng anaa sa 2,100 kilometros sidlakang Mindanao nga nagdala og gikusgong hangin nga 140 kilometros matag takna ug paghuros nga 170 km/hour.
Nag-irog kini sa gikusgon nga 23 kilometros matag oras paingon sa kasadpan.
Si Engr. Oscar Tabada, Director sa PAGASA-Visayas, niingon nga mas mabatyagan sa Luzon area ang bagyo’ng Chedeng gumikan kay mosulod kini sa Eastern Luzon ug makaapektar sa Central ug Northen Luzon.
Bisan pa man niini, makasinati gihapon ang ubang parti sa Kabisay-an ug mga pag-uwan panahon sa kagabhion o adlawan karong Miyerkules hangtud na sa adlaw’ng Domingo.
Gipasabot sa PAGASA nga ang pagsulod sa bagyo’ng Chedeng ug uban pa’ng bagyo wala nagpasabot nga mawala na ang weak El Niño apan magpadayun gihapon kini ug gani tungod sa El Niño posible ang usa ka bagyo mas mokusog pa tungod sa kainit sa temperatura sa kadagatan. – /GMR) (BANAT NEWS)