CEBU, Philippines - Nasikop sa mga polis sa Alegria ang duha ka armadong tulisan nga mitulis sa usa ka gasolinahan sa lungsod sa Malabuyoc pasado ala-una kagahapong adlawa sa Barangay Madridejos.
Wala hinuon mosukol sila si Adelaido Inanoria Jr. ug si Marvin Canilada, 25, nga pulos taga Carcar City.
Si Police Officer 2 Jupiter Elargosa sa Alegria Police Station miingon nga dunay mitawag kanila kabahin sa pagpanulis ug gisultian sa gisul-ob sa duha lakip na sa motor nga ilang gisakyan.
Tuod man, dali silang nakabutang og roadblock sa utlanan sa Alegria ug sa Badian ug didto sila nadakpan.
Nakuhaan ang duha og kalibre .357 nga revolver ug kapin sa P2 mil nga kwarta.
Si Senior Police Officer 3 Mario Paler sa Malabuyoc Police Station miingon nga didto nanulis sa Poblacion II nga gipanag-iya ni Barangay Kapitan Lito Narciso Crios III.
Matud pa nga gitionan sa duha ka tulisan ang pump boy ug dayong kuha sa kinitaan sa gasolinahan nga P7,780 ug dayong sibat. (BANAT NEWS)