CEBU, Philippines - Nakalingkawas sa grabe’ng pagkaangol ang municipal assessor sa Borbon diha’ng nadasmagan og motorsiklo sa paglabang sa karsada atubangan sa munisipyo alas 11 pasado ang takna sa buntag niadto’ng niagi’ng adlaw.
Swerte nga sa pagkatumba dali nga nasawo sa nihunong nga laing motorista.
Si Senior Police Officer 4 Morie Magdadaro sa Borbon Police Station niila sa biktima nga si Engineer Arestio Hortesa, 52, minyo nga nagpuyo sa maong dapit.
Matud ni Magdadaro nga nilabang paingon sa pikas habig sa karsada ang biktima hinungdan nga nihunong ang usa ka motorista apan ang nagsunod nga gimaneho ni Jeffrel Brigoli, 23, ang kalit lang ni-overtake.
Gumikan sa pag-overtake ni Brigoli, natapsingan si Hortesa hinungdan sa pagsaliring nga paingon na unta sa pagkadakdak sa karsada apan dali nga nasawo sa tiil sa laing motorista hinungdan nga wala nadayun sa pagkatumba.
Dugang ni Magdadaro nga si Hortesa nga nakaangkon og gagmay nga bun-og ang gidala gihapon sa tambalanan ug ang nakadasmag nga si Brigoli ang temporaryo’ng gitanggong alang sa sunod lakang nga himuon. (Romeo T. Limpangog/GMR)(BANAT NEWS)