CEBU, Philippines - Wala aprobahi sa Regional Development Council ang P21.3 bilyones nga giduso nga budget sa Department of Public Works and Highways (DPWH) alang sa mga proyekto sa dakbayan sa Sugbo sunod tuig.
Kini human wala moagi sa Cebu City Development Council (CDC) alang sa endorsement.
Si Engr. Nicomedes Leonor sa Cebu 2nd Engineering District sa DPWH-7 nagkanayun nga niadto’ng Marso 6, 2015 pa lang siya nilingkod sa katungdanan.
Matud niya nga susihon una niya ang dokumento sa maong giduso nga budget.
Gipasabot ni Leonor nga ang mga proyekto sa milabay’ng mga tuig ug ang mga implementasyon sa proyekto niini’ng tuiga mao’y iya’ng gitutukan.
Lakip sa wala aprobahi sa RDC-7 atol sa tigum kagahapon ang budget sa Department of Agriculture (DA) alang sa Negros Oriental gihapon sa wala’y koordinasyon sa Provincial Development Council (PDC).
Ang DA-7 niduso og P106.07 milyones nga budget alang sa mga proyekto ug programa sunod tuig sa probinsiya apan gikwestiyon sa kanhi gobernador sa Sugbo, Kongresista Gwendolyn Garcia sa ikatulong distrito, ang pagduso sa budget.
Gipasabot ni Garcia nga kinahanglang ipresentar una sa DA ngadto sa PDC ang budget proposal ug ang PDC mopalabang og resolusyon nga iduso ngadto sa Economic Development Committee sa RDC-7.
Si Gob. Roel Degamo sa Negros Oriental nipadayag sa iyang kasagmuyo ngadto sa DA-7 tungod sa wala’y koordinasyon. (Brenda D. Batuto/GMR)(BANAT NEWS)