CEBU, Philippines – Way mga kaugalingong pansayan ang mga namuyo sa Sitio Bayabas, ug Sitio Pinya sa Barangay Subayon, dakbayan sa Toledo nga diin dunay daghang nasakit og tipos.
Kini maoy gibutyag ni Bise Gobernador Agnes Magpale base sa gihimong inspeksyon sa Provincial Health Office.
Si Magpale mibutyag nga sa 25 ka pamilya nga namuyo sa Sitio Bayabas duha lang ang dunay pansayan.
Plano karon sa probinsya nga magtukod og kumonal nga pansayan nga dunay tangke sa hugaw diha sa Sitio Bayabas.
Upat ka adlaw na ang milabay, dihang 20 ka tawo sa maong barangay ang nangasakit ug gidudahang nasakit og dengue ug tipos.
Nasuta sa PHO nga ang tinubdan sa tubig sa nahisgutang lugar positibo kini sa kagaw gikan sa hugaw sa tawo ug hayopan tungod kay adunay piggery ug poultry sa maong dapit.
Ang Provincial Engineering misugyot nga pabutangan og takob ang mga atabay sa sitio Bayabas ug Pinya sa barangay Subayon, Toledo City.
Kini tungod kay nasuta nga dunay kagaw nga nakasulod sa maong atabay nga maoy gikuhaan og tubig mainom sa mga nagpuyo sa duha ka sitio. Tungod sa nahitabo gidid-an una sila paggamit sa tubig sa maong mga atabay.
Misugyot usab ang provincial engineers nga butangan kini og jetmatic pump nga maoy mobomba sa tubig paingon sa reservoir ug isunod ang chlorination o pagbutang og chlorine sa napundong tubig aron mapatay ang mga kagaw.
Ang Barangay Health Worker (BHW) nga nadestino sa lugar gikatakdang tudloan kun unsay hustong gidaghanon sa ibutang nga chlorine sa tubig. Ang maong proyekto gastohan sa probinsiya. – /EIM) (BANAT NEWS)