CEBU, Philippines – Gi-downgrade ang kasong frustrated murder ngadto sa slight physical injuries nga gipasaka ni Atty. Jiecel Tiu batok sa asawa sa Ronda Vice Mayor Jonnah John Ungab nga si Pearl Ungab.
Si Assistant City Prosecutor Liceria Lofranco-Rabillas nagkanayon nga wala siya makakita nga dunay intensyon si Pearl nga patyon si Tiu base sa ebidensya nga nakuha. Matud ni Rabillas nga wala maapil sa giduso nga medico-legal certificate ni Tiu kun pila ka adlaw o semana ang gikinahanglan aron siya mamaayo.
Gibase kini ni Rabillas sa usa ka jurisprudence (PP vs Panesa) nga matawag nga slight physical injuries ang usa ka krimen “if there is no proof as to the period of the offended party’s incapacity for labor or of the required medical attendance.”
Matud pa ni Rabillas nga kun dunay intensyon si Pearl nga patyon ang abogada, migamit na kini og pusil inay nga baseball bat o pagdasmag lang sa iyang pickup ngadto sa sakyanan ni Tiu.
Ang rekomendasyon ni Rabillas gidasonan usab ni officer-in-charge (OIC) - City Prosecutor Maria Luisa Ratilla.
Ang kaso napasaka na sa korte kagahapon ug tungod kay ipaagi man kini sa summary proceeding, wala na kinahanglana pa nga mopiyansa si Pearl. – /EIM) (BANAT NEWS)