CEBU, Philippines – Mas estriktong lagda sa paggamit sa mga sakyanan sa Kapitolyo gipatuman aron di kini magamit sa personal nga katuyoan sa mga kawani.
Mipagawas og memorandum ang Provincial General Service Office (PGSO) kagahapong adlawa aron estriktuhon ang pagamit sa mga sakyanan sa Kapitolyo sa tanang opisina ug departamento niini.
Gimando sa memorandum nga kadtong mogamit sa sakyanan pakuhaon og request form gikan sa PGSO Administrative Division ug pirmado sa department head sa opisina nga mi-request.
Ang pag-request sa maong sakyanan buhaton usa ka buwan o semana sa dili pa kini gamiton ingon man ipatuman usab sa PGSO ang “first come, first serve basis.”
Lima lang ka adlaw ang tagal sa paggamit sa maong sakyanan, kun molapas na kini gikinahanglan nga mohatag og formal letter request ang opisina nga aprubado sa PGS Officer.
Kadto lang mga PGSO driver ang tugotan pagmaneho sa maong sakyanan. – /EIM) (BANAT NEWS)