CEBU, Philippines – Gisibog og usa ka semana ang pagpagawas og desisyon kabahin sa reklamo ni Bise Mayor Efren Gica sa lungsod sa Dumanjug batok sa ilang mayor nga si Mayor Nelson Garcia sa kasong grave abuse of authority.
Una nang girekomendar sa committee on complaints and investigation sa Hunta Probinsiyal nga nakalapas g’yud si Garcia ug suspensuhon kini og unom ka buwan.
Apan sila si Bokal Alex Binghay ug Sun Shimura miingon wala sila makabasa sa committee report tungod kay kagahapon lang nila kini madawat.
Tungod niini, nasabotan sa hunta nga isibog ang pagpagawas sa desisyon “ for humanitarian reason.”
Si Garcia nga nahinabi sa mga tigbalita kagahapon mipasangil nga pulos bakak ang resolusyon sa committee sa iyang kaso ug wala siya hatagi og kahigayonan sa pagyagyag sa kamatuoran.
Miduso si Garcia og duha ka motion nga mao ang pagpaabot sa tubag sa Office of the President nga iyang gisang-at didto mahitungod sa kaso ug ang paghatag kaniya og usa ka adlaw nga board hearing.
Apan giangkon niya nga bisan gi-defer ang pagpagawas sa desisyon nakahibawo siya nga kombiktohon gihapon siya.
Dugang ni Garcia nga tun-an sa iyang kampo ang ilang legal nga aksyon batok niini. – /EIM) (BANAT NEWS)