CEBU, Philippines - Gitagalan hangtud sa Marso si Highway Patrol Group Director, Police Chief Supt. Arrazad Subong, sa pag-turnover sa iyang tulo ka sakop kinsa akusado sa pagbanhig-patay kang Atty. Noel Archival.
Matud sa igsuon nga si Konsehal Nestor Archival sa dakbayan sa Sugbo nga kun mapakyas ang HPG sa pag-turnover nila’ng Police Senior Supt. Romualdo Iglesia, Senior Insp. Joselito Lerion ug Police Officer 1 Alex Bacani, mopasaka sila og kaso.
Gidugang sa konsehal nga gukdon gyud nila ang responsable sa kamatayun sa iyang igsuon nga brutal nga gipatay sa mga mamumuno.
Gitumbok ni Archival ang kadagkuan sa HPG nga hinungdan nga nadugay ang kaso tungod sa tinguha nga pagbalhin sa kaso gikan sa Sugbo ngadto sa kaulohan.
Usa ka tuig na ang nakalabay human gibanhigan patay ang abogado sa Coro, lungsod sa Dalaguete.
Ang mga akusado temporaryo nga gikustodiya sa holding center sa Camp Crame apan dihang nigawas ang warrant of arrest nasuta nga wala didto ang tulo ka polis. (Decemay P. Padilla/GMR)(BANAT NEWS)