Magtiayon na buy-bust, P.5M shabu nasakmit
CEBU, Philippines – Nasikop sa buy-bust operation sa mga sakop sa Regional Special Operations Group-7 ang magtiayon nga nakuhaan og 50 gramos nga gituohang shabu diha sa ilang panimalay sa Barangay Kalunasan ning dakbayan sa Sugbo.
Ang mga nasikop naila nga sila si Harley Jacaban, 29, ug asawa nga si Josephine, 29, nga duna’y duha ka gagmay nga mga anak nag-edad og nuwebe ug sayes anyos. Matud pa ni Superintendent Rex Derilo ang hepe sa RSOG-7 nga duha ka semana nilang gipanid-an si Harley human nakakuha og impormasyon bahin sa ilegal nga negosyo sa suspetsado.
Si Derilo miingon nga usa ka level 2 drug pusher si Jacaban nga makabaligya og 300 gramos sa drugas matag semana.
Pasado alas-7 sa buntag sa dihang gihimo ang buy-bust operation ang kapulisan ug napalitan kini og duha ka gagmay nga paketeng shabu sa asset sa kapulisan kantidad P400.
Atol sa pagsubay sa kapulisan ila ‘sab nga narekober ang daghang drugas kantidad kapin P500,000 ug dunay cash nga P12,000.
Gipasabot ni Derilo nga ilang giapil og sikop ang asawa kay mao kini ang gihatagan sa iyang bana sa buy-bust money.
Nasayran ‘sab sa kapulisan nga nasikop na sa nakalabay nga tuig si Harley sa susama gihapon nga kaso, apan wala pa masayri kun nganong nakagawas kini sa prisohan.
Gikatahong gikan sa usa ka ginganlan og “Ken” nga natanggong karon sa New Bilibid Prison” ang nagsuplay kaniya sa drugas. – /EIM) (BANAT NEWS)
- Latest
