CEBU, Philippines - Usa ka sinkhole ang mitumaw sa Barangay Talayong, lungsod sa Badian niadtong Enero 2 human sa pagbundak sa kusog nga ulan tungod sa bagyong Seniang. Si Kapitan Floro Bijona sa maong barangay nga nahinabi sa Banat News mibutyag nga ang maong sinkhole nibutho sa may sapa-sapa sa Sitio Timba niadtong pagbundak sa makusog nga ulan. Napulo na ka tiil ang gilapdon niini ug nasudlan og tubig sa ulan ug sa tubig sa sapa.
Sumala pa ni Bijona natingala ang mga tawo nganong wala na’y mi-agas nga tubig sa sapa-sapa ug sa ilang pagsubay didto na diay kini misulod sa bangag sa sinkhole.
“Maayo unta og masubay kay pila na gud ka adlaw unya wala gihapon siya napuno sa tubig, asa man diay paingon ang tubig kung dili na siya lawom?” pasabot pa ni Bijona.
Layo ra hinuon sa mga balay ang maong sinkhole apan si Police Officer 3 Dionesio Anticristo mitug-an sa Banat News nga ila nang gikoral ang lugar aron wala’y tawong mopaduol niini.
Mao na kini ang ikatulo nga sinkhole nga mobutho sa probinsya sa Sugbo sud sa duha ka bulan, dunay nakita nga sinkhole sa barangay Manduyong sa samang lungsod ug usa sa mga barangay sa lungsod sa Alcantara. (BANAT NEWS)