CEBU, Philippines - Patay ang usa ka kapitan sa lungsod sa Dumanjug human kini gipusil sa usa lalaki kagahapon sa buntag sa merkado publiko sa maong lungsod nga nahimutang sa Barangay Poblacion.
Ang biktima naila nga si Cipriano Torquedo, 59, kapitan sa Barangay Tubod-Dugoan nga nakaangkon og upat ka samad sa iyang tangkugo ug sa ulo samtang napagan ang usa ka Mark Cabasag, 30, nga naigo sa paa.
Mosugat unta sa iyang kapuyo nga si Victoria Servantes ang biktima dihang nahitabo ang pagpamusil.
Matud pa ni Police Officer 3 Dionesio Tagopa, ang imbestigador sa maong kaso nga ang suspek mao si Danilo Avila nga adunay standing warrant of arrest gumikan sa pagpatay sa pag-umangkon sa biktima niadtong 2012.
Sumala pa sa kapuyo sa biktima ngadto sa kapolisan, daan na silang nakabantay sa Barangay Tubod-Dugoan nga dunay nagsunod kanila nga nagmotor apan wala lang nila kini panumbalinga.
“Nakit-an gyud sa live-in partner nga siya (Avila) ang nagpusil, primero sa tangkugo, dayon sa ulo gitirahan katulo dapit sa tuo nga ulo, gisiguro nga dili mabuhi,” matud pa ni PO1 Silvestre Zulueta ang desk officer sa Dumanjug Police Station.
Personal nga bikil sa biktima ug sa suspek ang gisubay sa kapolisan tungod kay gisigehan na og text sa suspek ang biktima nga patyon. (BANAT NEWS)