CEBU, Philippines – Usa ka convenient store sa lungsod sa Balamban ang gitulis sa tulo ka wala mailhing tawo sa niaging tungang gabii.
Ang gitulis mao ang 7 Eleven convenient store sa barangay Sto. Niño-Sta. Cruz sa maong lungsod. Matud ni SPO1 Jose Villarino, imbestigador sa Balamban Police, nga tulo ka armadong tulisan ang miataki sa tindahan kinsa sakay sa duha ka motorsiklo.
Nasayran nga samtang nagsulat sa log book ang guwardiya ug ang kauban niini nga trabahante nanghugas sab sa ice cream machine dihang kalit lang nibutho ang mga tulisan ug mition dayun sa guwardiya. Wala na nakalihok ang guwardiya nga si Alex Medallo kay gawas nga nakalitan, wala sab kini’y armas.
Usa sa mga tulisan ang nimando sa cashier nga si Celito Sermon nga ablihan ang drawer sa kwarta ug nadala sa mga tulisan ang P7,000.
Gihulagway nga nagsuot og kawo ang mga tulisan ug wala nagtaptap sa ilang nawong.
Matud ni Villarino nga gawas nga wala’y armas ang guwardiya, wala’y close circuit television (CCTV) camera ang tindahan. – /GMR) (BANAT NEWS)