CEBU, Philippines – Usa ka car dealer ang gipasakaan og kaso sa National Bureau of Investigation-7 tungod sa kalapasan sa Anti-Fencing Law human giingong mibaligya og kinawat nga sakyanan nga iya sa asawa ni boxing promoter Rex “Wakee” Salud.
Sumala pa ni NBI Regional Director Max Salvador, ang ilang gikasohan mao si Jaime Ang sa Ayala Motors nga nahimutang sa Mabolo, Cebu City tungod sa alegasyong gibaligya niini ang sakyanan ni Elvira Salud nga kapikas ni “Wakee” Salud nga gikarnap.
Base sa imbestigasyon ni supervising agent Atty. Renan Oliva nga niadtong Septiyembre 10, 2014, si Elvira nakapalit og 2009 dark gray Mitsubishi Strada GLS 2.5 pick-up nga may plakang NPO 553 nga gipanag-iya ni Abelardo Malimban sa Binangonan, Rizal.
Niadtong Oktubre 3, 2014, niadto sa ilang balay si Peter Santos ug Stephen Tan kay gusto nilang paliton ang sakyanan, misugot si Elvira sa presyo nga P800,000.
Ang duha giingong mi-test drive sa sakyanan apan wala na sila mobalik. Nadiskubrehan na lang nga naka-display na kini sa Ayala Motors.
Si Ang sa iyang bahin nagkanayon nga ang maong sakyanan gidala kaniya ni Januario Adlawan, Santos , Tan uban sa usa ka Rachel Jumao-as.
Nagdala sila og Deed of Absolute Sale nga giingong pirmado ni Malimban, apan gihimakak ni Malimban nga iyaha ang maong pirma. Ang NBI-7 mipasaka usab og kasong carnapping batok nilang Santos, Tan, Adlawan ug Jumao-as. – /EIM) (BANAT NEWS)