CEBU, Philippines - Ang national nga kagamhanan gikatakdang mangutang og P500 milyones gikan sa World Bank (WB) alang sa “farm to market road” project sa probinsiya sa Sugbo.
Si Provincial Agriculturist Roldan Saragena mibutyag nga ang maong budget alang kini sa sunod tuig ug ang kagamhanan sa probinsiya mohatag usab og tugbang nga 10 porsiyento o P50 milyones.
Ang kagamhanan sa probinsiya gikatakdang mogama og feasibility study sa maong proyekto ug livelihood project sa mga mag-uuma nga maoy makagamit sa maong dalan. Niining tuiga, nangutang na ang gobiyerno og P200 milyones sa WB alang sa maong proyekto nga tugbangan usab sa probinsiya og P20 milyones.
Usa sa rekisitos nga gipangayo sa WB una pa aprubahan ang maong loan, mao ang feasibility studies nga gamitan sa maong kwarta.
Nasuta nga moabot og 20 kilometros ang gitas-on sa mga farm to market road projects nga tukoron diha sa dakbayan sa Bogo, San Remigio ug Daanbantayan.
Laing feasibility study na sad unya ang himuon alang sa sunod pang susamang mga proyekto. (Brenda D. Batuto/EIM)(BANAT NEWS)