CEBU, Philippines – Maayong pagkasunog sa usa ka taxi nga mikalit lang pagsilaob samtang nagdagan kini didto sa dalan Escario kagahapon sa buntag.
Naglumba sa pagpanggawas ang drayber sa taxi ug ang iyang pasahero diha nga nakabantay sila nga misilaob na ang Emerson Taxi nga nagpaingon unta sa Capitol Compound.
Ang driver nga si Gilbert Vildosola miingon nga igo ra siya nga mi-extra og drive sa maong taxi ug wala siya’y nabantayan nga kakulian dihang iya kining gikuha sa garahe.
Sagad buhaton sa mga drayber kun may grounded nga alambre sa ilang unit mao ang pagtangtang sa batereya apan wala kini mahimo ni Vildosola.
Nilanat pa og pila ka minutos una napasiritan og tubig sa mga bombero ang nagdilaab nga taxi. Ilang gibasol ang kahuot sa trapiko hinungdan nga nalangay sila pag-abot sa fire scene.
Ang representante sa Emerson’s taxi nga si Jean Galon dali nga miadto sa dapit nga nasunogan ug kini miingon nga aksidente ang nahitabo ug walay tulubagon ang ilang driver. Si FO1 Ritchie Saldasal mipahimangno sa mga motorista, ilabi na sa mga taxi driver, nga siguradohon nga walay kakulian ang ilang mga sakyanan. – /RUB) (BANAT NEWS)