CEBU, Philippines – Mga event organizers kansang kalihokan muabot og usa ka gatos ang manambong kinahanglang mosumitir na og emergency ug disaster plan sa dili pa nila himuon ang kalihokan.
Napasar na sa ikaduhang public hearing ang ordinansahon ni Konsehal Dave Tumulak nga “The Emergency and Disaster Plan Requirement Ordinance.”
Si Tumulak, kinsa mao usab ang tsirman sa Cebu City Disaster Risk Reduction and Management Council (CCDRRMC) nagkanayon nga ang dakbayan sa Sugbo pirmeng nahimong venue o host sa daghang local ug international events.
Ang tumong sa nahisgutang ordinansahon mao ang safety sa mga mutambong sa mga ipahigayong events dinhi sa siyudad.
Himuon nang usa sa mga rekisitos sa mga event organizers ang emergency plans una pa sila hatagan og mayor’s permit. Ang Research and Planning Officer (RPO) sa CCDRRMC mao ang mo-evaluate sa isumitir nga emergency and disaster plan aron hatagan sila og endorsement ngadto sa buhatan sa mayor aron sila hatagan og mayor’s permit. – /EIM) (FREEMAN)