Duha ka polis nagpabadlong

CEBU, Philippines – Usa ka polis nanumbag og drayber sa taxi samtang ang laing polis gidakop sa iyang mga kauban human gireklamo nga nanion og armas samtang giingon nga nakainom.

Si Police Regional Office (PRO)-7 director Prudencio Tom Bañas nasubo kay samtang dunay mga polis nga nagtinarong pagserbisyo ang uban nagpabadlong.

Ang giingong nanuntok og drayber sa taxi mao si PO2 Rey Iligan samtang ang gidakop ug gipasanginlan nga nanion og armas mao si PO1 Randy Restopa, nadestino isip Field Training Police sa dakbayan sa Talisay.

Ang report nagkanayon nga si Iligan, usa ka polis nga nadistino sa CCPO Station 2, nagpaingon na nga mopauli sa Barangay Calamba luwan sa iyang motorsiklo kagahapon sa buntag apan nababagan sa taxi kay ang drayber adunay gipakanaog nga pasahero’ng senior citizen.

Matud pa nga gikasab-an ni PO2 Iligan ang drayber sa taxi nga si Leonilo Bucado tungod sa paghunong taliwala sa karsada diha’ng gipakanaog niya ang 61-anyos nga si Denia Alvarez.

Diha nga nangatarongan si Bucado misamot nga nasuko si PO2 Iligan ug matud pa kalit nga gisumbag sa nawong ang drayber ug iya pa nga gipusasan. Wala na hinuon mohatag og dugang pamahayag si PO2 Iligan didto sa police station apan ang drayber mitug-an nga gisumbag siya sa polis makatulo ka higayon.

Samtang ang field training police nga si PO1 Restopa gidakop sa mga sakop sa Mobile Patrol niadto’ng Lunes didto sa Barangay Sta. Cruz ning dakbayan human gipasanginlang hubog ug nanion og armas.

Si PO1 Restopa nanghimakak hinuon nga nanion siya’g armas kay wala kuno siya isyuhi og armas sa iyang mga opisyal apan miangkon nga naka inom og ilimnon nga makahubog.

Apan ang reklamante nga si Erlinda Pasumala miingon nga ang iyang pag-umangkon nga si Marlon Romero, 28, gitionan g’yud og armas sa maong polis. – /RUB) (BANAT NEWS)