CEBU, Philippines – Gihiklin una sa konseho ang ordinansahon sa paghatag og bike lane sa kadalanan sa dakbayan sa Sugbo. Si Konsehal Nida Cabrera ang niduso sa ordinansahon aron pagdasig sa paggamit og bisekleta nga maminusan ang carbon emission.
Matud ni Konsehal Noel Wenceslao nga sigpit ang karsada sa dakbayan sa Sugbo ug iyang gisugyot ang off-road bike lanes alang sa safety sa mga bikers.
Gipadayag ni Wenceslao nga kun matuman ang Bus Rapid Transit (BRT) mosamot ka gamay ang karsada kung kuhaan pa kini og 1.5 metros alang sa bike lane.
Si Konsehal Mary Ann Delos Santos nagkanayon nga ang plano ni Cabrera maayo kung ang siyudad lapad ang karsada.
Gani, human sa road sharing experiment, daghan ang nagbagolbol tungod kay naghuot ang dagan sa trapiko. Ang mga sidewalk gi-okupar na usab sa mga manindahay ug ang uban gihimong parking area sa establesemento.
Dugang ni Delos Santos nga angayang tun-an pag-usab ang desinyo sa karsada kun ugaling magbutang og bike lanes.
Si Cabrera mismo ang miduso nga ihiklin sulod sa usa ka semana ang ordinansahon alang sa dugang pagtuon. – /GMR) (BANAT NEWS)