CEBU, Philippines - Nangaangol ang drayber ug mekaniko human nga ang ilang gisakyan nga bus nabangga ngadto sa koral sa usa ka balay sa Barangay Perelos, dakbayan sa Carcar kagahapon sa kaadlawon.
Ang nakaangkon og mga samad mao sila si Ritchel Apundar, 40, minyo, taga Poblacion, Oslob, nga drayber sa bus samtang angol usab si Cirilo Villamor, 38, minyo, taga C. Padilla Street, dakbayan sa Sugbo.
Si PO1 Raymond Amance, desk officer sa Carcar Police Station miingon nga ang bus gikan sa Barangay Bolinawan sa dakbayan sa Carcar ug nagpadulong sa dakbayan sa Sugbo. Apan ang bus (GXT 595) kalit lang nga mitipas ngadto sa pikas nga bahin sa karsada human nga nawad-an og control ang drayber sa iyang sakyanan. Gidam-agan sa bus ang koral sa panimalay ni Mary Ann Arnaiz.
Nalumping ang pangunahan nga bahin sa bus ug nagupok ang bildo ug maoy nakapaangol sa drayber. Suwerte hinuon kay walay mga pasahero ang bus atol sa mao nga higayon mao nga ang drayber ra ug mekaniko ang naangol. - /RUB (BANAT NEWS)