CEBU, Philippines - Tres anyos nga bata gilugos sa kaugalingong amahan nga biyudo diha sa usa ka barangay sa lungsod sa Cordova sa miaging Huwebes ning semanaha.
Matud ni Police Inspector Alexander Nuñez, hepe sa Cordova Police Station, ilahang gidakop ang amahan ala-una sa buntag didto sa iyahang balay.
Ang 41- anyos nga suspek nga usa ka truck boy dunay onse ka mga anak ug ang 3-anyos maoy kinamanghuran niini nga maoy iyang gisungkab. Dugang ni Nuñez, si Jose Montebon sa Department of Social Welfare maoy niadto sa ilahang buhatan ug misumbong nga adunay batang gipanamastamasan sa kaugalingong amahan sa maong barangay.
Daling miimbestigar si PO2 Maria Ilona Cimafranca sa Women Desk sa mao nga estasyon. Ang bata bisan sa kalinghod pa niini masabot ang iyang inestoryahan kun giunsa siya sa pag-abuso sa iyang amahan.
Matud pa matag kaadlawon hilabtan sa suspek ang anak nga madunggan sa mga silingan ang paghilak niini. Ini og ka buntag hilantan ang bata hinungdan nga naalarma na ilang mga silingan, sumala pa sa report sa TV Patrol Central Visayas kagahapon.
Ang bata anaa sa kustodiya sa iyahang iyaan sa Cordova ug kasamtangang gipaubos sa obserbasyon sa mga social workers.
Ang suspek gipasakaan na kagahapon og incestuous rape diha sa piskalya. (BANAT NEWS)