CEBU, Philippines – Moabot sa lima ka tawo ang nasikop sa City Intelligence Branch sa Cebu City Police Office atol sa duha ka managlahing operasyon niadtong Domingo sa gabii hangtud buntag sa adlaw’ng Lunes.
Nihimo sa pagpatrolya ang mga sakop sa CIB sa sitio Riverside, B. Rodriquez Street, Sambag II, Cebu City diin tulo ka tawo ang nasikop nga naghupot og ilegal nga drugas ug mga drug paraphernalia.
Ang mga nasikop naila nga sila si Jullios Barriga, 24, nagpuyo sa maong lugar; Jhonas Villamor, 30, nga taga Capitol Site ug Joffrey Impenida, 22, taga Sambag II.
Matud ni PO3 Noel Bautista, ang team leader sa pagsikop sa mga suspek, nga ila gyud nasakpan si Barriga nga paingon na unta nga mamaligya sa drugas ngadto nila ni Villamor ug Impenida.
Daling gisikop sa kapolisan ang mga suspek ug nakuha ang mga drugas nga dunay kantidad nga P12,300 lakip na ang mga drug paraphernalia.
“Paingon na unta siya mobaligya, nasakpan lang,” matud ni Bautista.
Samtang alas 9 sa buntag kagahapon, tulo sab ka tawo ang nasikop atol sa buy-bust operation nga gihimo sa CIB sa sitio NGA, Lahug.
Ang mga nasikop naila nga sila si Julius Malazarte, 32-anyos nga giilang level 3 drug pusher; Johnny Flores, 25, tag-iya sa balay nga gironda sa kapolisan ug usa ka call center agent nga gipugngan una ang pangan samtang padayon pa nga giimbestigar sa kapolisan.
Ang deputy chief sa CIB nga si Insp. Gomersendo Mandawe nga nangulo sa maong operasyon mibutyag nga ilang gisubay ang taho kabahin sa mga tawo nga sulod gawas sa balay ni Flores ug gikatahong magsuyop.
Mga estudyante, call center agents ug mga habal-habal drayber ang gikatahong kostumer nila ni Malazarte ug Flores nga giingong kasosyo sa negosyo sa drugas.
Ang usa ka call center agent ang apil sab nga gidala sa kapolisan human nakit-an sa kuwarto sa maong balay ug miangkon nga mogamit og drugas apan wala nakuha-i og ebidensya. -/GMR) (BANAT NEWS)