CEBU, Philippines - Dakung uyon ang mga opisyal sa kapolisan sa Central Visayas sa plano nga ipaubos sa “lifestyle check” ang mga sakop subay sa kamandoan sa Department of Interior and Local Government (DILG).
Matud ni Police Regional Office-7 Director, Chief Superintendent Prudencio Bañas, nga andam sila mosunod sa plano aron masayran ang mga sakop nga nakapundar na og mga kabtangan gikan sa dautang paagi. Gipasabot ni Bañas nga pinaagi niini masayran kun diin gikan ang bahandi sa ubang kapolisan samtang malimpyohan usab ang pangan niadtong nagtinarung sa trabaho.
Samtang ang hepe sa City Intelligence Branch sa Cebu City Police Office, Supt. Romeo Santander, uyon usab sa maong plano.
Matud ni Santander nga wala’y gipugngan nga sakop nga makabaton og mga kabtangan apan labing maayo kun mapasabot kini kung diin gikan.
Nanghinaut si Santander nga unta tanang polis ang ipaubos sa “lifestyle check” gikan sa labing taas hangtud sa ubos nga sakop aron makita sa publiko nga wala’y gitago ang kapolisan. (Jojo C. Ugdol/GMR)(BANAT NEWS)