CEBU, Philippines - Nadawat na ni Governor Hilario Davide III ang resignation ni capitol chief of security Loy Anthony Madrigal ug sa iyang sekretarya kagahapong adlawa.
Matud ni Provincial Administrator Mark Tolentino nga ang Committee on Discipline and Investigation (CODI) dili na mohimo og imbestigasyon sa giingong “illicit affair” sa duha tungod kay moot and academic na kini human gidawat ilang resignation letter nga ilang giduso niadtong Huwebes.
Apan matud ni Tolentino wala siya makabasa kun unsa ang content sa maong resignation letter.
Gipaabot pa usab sa Kapitolyo nga iuli ni Madrigal ang siyam ka mga armas nga giisyu kaniya human nga nauli na niini ang pickup ug usa ka motor.
Samtang, matud ni Provincial Administrator Mark Tolentino nga nagpadayun ang pagtabang sa probinsya ngadto sa biyuda nga si Marites Mirambel kansang bana nga si Felix namatay human madasmagi sa sakyanan nga gipagamit sa probinsiya ngadto kang Madrigal niadtong Septiyembre 14, 2014 sa alas 8:20 sa gabii sa Barangay Don Pedro, Bogo City.
Dihang gisuwayan og tawag si Madrigal sa iyang mobile phone dili kini ma-contact.(Mylen Manto/EIM)(BANAT NEWS)