CEBU, Philippines - Mimando ang hepe sa Cebu Provincial Police Office Senior Superintendent Noel Gillamac sa kapolisan sa dakbayan sa Talisay nga masulbad gilayon ang tulis sa Avon Products and Cosmetics Tabunok Branch nga miresulta sa kamatayon sa usa ka gwardiya.
Target nila karon nga mailhan ang duha ka tulisan nga nakuha sa closed circuit television (cctv) camera, ug nagtuo si Gillamac nga nalambigit sa ubang pagpanulis ang duha.
Nakig-alayon karon ang CPPO sa kapolisan sa dakbayan sa Sugbo, Mandaue ug Lapu-Lapu ug gipalihok na ang intelligence communities pagpaniid sa maong grupo.
Ang hepe sa kapolisan sa dakbayan sa Talisay nga si Superintendent Reycel Carmelo Dayon miingon nga duna na silay gisundan nga grupo. Nagkatag na usab ang mga checkpoints sa N. Bacalso Avenue hangtod na didto sa gipanghitaboan aron magbantay.
Bisan sa nahitabo, nangabli gihapon ang maong tindahan kagahapong adlawa ug duna say donation box nga gibutang sulod sa maong tindahan alang sa pamilya sa mitaliwan nga gwardiya. (Bryner L. Diaz ug Khacel Anne Sanchez/EIM)(BANAT NEWS)