CEBU, Philippines - Giawhag sa Department of Environment and Natural Resources-7 ang paghingusog sa paglimpiyo sa mga kanal ug mga sapa isip laing paagi sa pagsulbad sa masinati nga mga pagbaha.
Si Dr. Isabelo Montejo, DENR-7 regional executive director, mi-awhag sa higpit nga pagpatuman sa pagbahig sa malata ug dili malata nga basura ug ang tukmang paglabay niini.
Matud ni Montejo nga ang pagpataka og labay sa basura sa malata ug dili malata mopaingon kini ngadto sa mga kanal ug mga sapa nga maoy hinungdan sa pagkabara sa pagdagayday sa tubig nga moresulta sa pag-awas ug mga pagbaha.
Gitumbok usab ni Montejo ang pipila ka mga istruktura nga gitukod sa maong mga dapit nga nakatampo sa pagbara sa pagdagayday sa tubig nga mao usab ang hinungdan sa pag-awas sa mga kanal ug mga sapa.
Hinuon si Mayor Jonas Cortes sa dakbayan sa Mandaue dugay na nga mihingusog sa kampanya sa pagbahig sa madunot ug dili madunot nga matang sa mga basura ug tukmang paglabay niini.
Dugang usab nga gihimo ni Cortes mao ang gihingusgan nga pagpabalhin sa mga informal settlers nga ang mga panimalay nahimutang daplin sa Mahiga Creek ug Butuanon River ug paghawan sa mga istruktura nga nahimutang niini.
Giila ni Montejo ang mga barangay nga kanunay gihulga sa mga pagbaha base sa labing bag-o nga geo-hazard mapping ug assessment nga gihimo sa Mines and Geosciences Bureau-7 nga nalakip na niini ang mga barangay sa dakbayan sa Sugbo ug dakbayan sa Mandaue.
Sa dakbayan sa Mandaue iyang giila ang mga barangay nga kanunay nga magbaha sama sa Subangdaku, Mantuyong, Umapad, Opao, Alang-alang, Guizo ug Paknaan. (BANAT NEWS)