CEBU, Philippines - Makadawat og P10,000 nga Charter Day bonus ang 600 kapin ka mga regular nga kawani sa kagamhanan sa dakbayan sa Mandaue.
Ang ordinansa nga gipasar sa konseho naglatid nga ang regular nga kawani makadawat og cash incentives nga P7,000 ug milestone anniversary sa kantidad nga P3,000 o P10,000 ang kinatibuk-an.
Matud ni Konsehal Diosdado Suico sa iyang gipangamahanan nga ordinansa nga ang kagamhanan sa dakbayan miila sa kamahinungdanon sa gikatampo sa tanang kawani sa kalamboan nga naangkon.
Nahunahunaan sa mga opisyal ang kahimtang sa mga kawani nga nasugamak sa usbaw sa mga nag-unang palaliton karong panahona. Gumikan niini nahukman sa Local Finance Committee ang pagduso sa ordinansahon nga maoy maghatag og pagtugot kang Mayor Jonas Cortes sa pagpagawas sa pundo alang sa cash incentives ug milestone anniversary bonus sa mga kawani alang karong tuiga.
Samtang laing ordinansa ang gipasar nga maghatag og usbaw sa binuwan nga sweldo sa tanang job order, clean and green personnel, barangay health workers ug mga nutrition scholars sa dakbayan. Sa maong ordinansa nga gipangamahanan gihapon ni Suico maoy gilatid nga ang maong 2,000 ka mga kawani makadawat og usbaw sa ilang sweldo gikan sa P2,660 ang matag buwan ngadto na sa P3,660. (BANAT NEWS)