CEBU, Philippines- Boluntaryong mitahan sa iyang kaugalingon ang lalaking mipusil ug nakaangol ni PO1 Exequiel Melodia II niadtong Lunes sa kaadlawon diha sa merkado sa dakbayan sa Lapu-Lapu.
Kauban ang iyang mga kabanay ug hepe sa Station 3 nga si Senior Inspector Wilbert Parilla, mitahan si Jeffrey Bayon, 20, sa buhatan ni Senior Superintendent Armando Radoc, hepe sa Lapu-Lapu City Police Office niadtong Lunes sa gabii.
Matud ni Radoc, gipahunong niya ang manhunt operation human nga mitawag kaniya si kanhi kongresista Arturo “Boy” Radaza nga nagpahibalong dunay surrender feelers ang suspek, pagkaalas-9 sa gabii miabot ang suspek sa buhatan ni Radoc.
Sumala pa ni Radoc, si Bayon mitug-an nga nabuhat niya kadto tungod kay nahadlok siya sa tawong kalit nga miduol kaniya nianang higayona diha sa iyang giestambayan.
Wa usab ma-recover ang .38 revolver nga giingong maoy iyang gigamit sa krimen kay iyaha kini gilabay sa dagat tungod sa kahadlok.
Subling gipahimangnoan ni Radoc ang mga sakop nga mag-amping gyud kanunay tungod sa peligro gumikan sa matang sa ilang trabaho. - /EIM) (BANAT NEWS)