CEBU, Philippines- Ang kagamhanan sa dakbayan sa Sugbo gikatakdang mohatag og dugang P10 sa budget sa kaon sa matag piniriso sa Cebu City Jail.
Si Labella nga nahinabi sa mga tigbalita kagahapon nagkanayon nga sa ilang nasayran ang matag piniriso duna lang kini P50 nga budget sa kaon matag adlaw o P16 matag kaon nga maoy gigahin sa Bureau of Jail Management and Penology (BJMP).
Matud ni Labella nga ang kagamhanan sa siyudad mohatag og dugang P10 nga budget sa kaon sa matag piniriso aron mahimong P20 kada kaon nila kini ubos sa sugyot sa Police Coordinating Advisory Council (PCAC). Ang maong budget nga igahin iapil kini sa budget sa sunod tuig o posibleng iapil sa supplemental budget.
Matud usab ni Labella nga ang Cebu City Jail (CCJ) dunay 2,000 ka mga pinirisong mga lalaki ug 229 ang babaye.
Karong Martes sa sunod semana, sa kasaulogan sa Crime Prevention Week ang PCAC gikatakdang adto sa CCJ magpahigayon og meeting ug adto usab kini maniudto aron mabatyagan ug matilawan nila ang gikaon sa mga piniriso sa P16 nga budget.
Dugang sa bise mayor nga mobayad lang sila sa i-serve nga pagkaon tungod kay ang budget sa ilang kaunon budget sa national nga kagamhanan alang sa mga priso.
Gihangyo ni Labella ang jail warden nga si Superintendent Johnson Calub nga sama gyud sa i-serve nga pagkaon sa mga piniriso ang ipakaon nilang mga miyembro sa PCAC. - /EIM) (BANAT NEWS)