Polis patay, 3 angol

CEBU, Philippines - Patay ang usa ka polis ug kritikal ang laing tulo niini ka kauban human sila gipamusil sa gihulagway nga “set up” sa ilang pagresponde sa usa ka alarma nga dunay nagsuyop og drugas sa Sitio Ubos, Barangay Poblacion I, Tagbilaran City, Bohol, kagahapon sa alas 9:30 sa buntag.

Patay sa maong pagpamusil si PO1 Michael Ejoc, samtang kritikal ang kahimtang nila ni PO1 Reynan Tagotongan, PO1 Carlito Gamalo ug PO2 Judito Jasmin. Usa ka babayeng suspek ang nadakpan nga giila nga si Belinda Tesorero, 34, kinsa nakuhaan og upat ka paketeng shabu, drug paraphernalia ug mga basiyo sa bala diha sa crime scene.

Samtang ang gitudlo nga suspek sa pagpamusil si Bejun Tari, nga notadong drug personality sa maong lugar padayon pang gipangita.

Matud pa ni Senior Inspector Roland Lavisto, deputy chief sa Provincial Public Safety Company (PPSC) sa lalawigan sa Bohol nga nahinabi sa Banat News,  ang iyang mga sakop gi-detail sa Provincial Intelligence Branch (PIB) sa Bohol.

Sumala pa ni Lavisto nga dunay mitawag kanila ug misumbong nga dunay nanuyop sa maong dapit hinungdan nga giadto kadto sa mga polis.

Matud pa nga unom ka mga polis ang miresponde apan ang upat lang ka polis ang unang misulod sa area samtang ang usa nauwahi ug ang usa nagpabilin sa sakyanan. Apan pag-abot nila duol sa usa ka balay kalit mipaka ang usa ka buto ug nahagba si Ejoc nga may igo sa ulo nga gisundan dayon og butobuto ug tagsa-tagsang nangahagba ang tulo niya ka kauban. Si PO1 Gamalo nakabalos pa unta apan naigo ‘sab kini sa dughan.

Sumala pa ni Lavisto nga human sa pagpamusil ni Tari migawas kini sa gitagoang balay ug gikuha ang armas ni Ejoc ug maoy gigamit sa pagpamusil sa iyang mga kauban.

Matud pa gipalusot lang sa bintana ni Tari ang armas pagpusil kang Ejoc ug gipalapsan niini ang bungbong sa gitagoan diin mahimutang ang mga kauban ni Ejoc.

“Duda nako basin nahutdan ‘to siya og bala, mao gikuha niya ang armas ni Ejoc, nakabantay na g’yud ‘to siya kay gibanabana ra man niya nga ipalapos lang  sa wall ang bala, igo man g’yud ang mga polis,” matud pa ni Lavisto kinsa midugang nga posibleng dunay spotter si Tari nga miapil pagpusil sa mga polis.

Ang duha ka mga kauban sa mga biktima ang dali gilayon nga miresponde  ug maoy giingong nakapakgang kang Tari pagtiwas sa tulo ka mga naangol. Matud pa sa opisyal nga bag-ohay pa nga nakagawas sa New Bilibid Prison ang suspek  sa kaso sa drugas.

Gihulagway ni Lavisto nga anaa sa delikado ang kahimtang ni PO1 Tagotongan kay miungot  ang bala sa ulo niini, samtang ang laing duha makatingog na apan talandogon gihapon ang kahimtang. Dunay leksyon nga nakuha ang kapulisan human sa nahitabo. Si Chief Insp. George Vale, pangulo sa IDMB sa Bohol nga kun motubag og mga alarma di gyud angay i-underestimate ang  mga subject. Hinuon si Vale di motuo nga na “set up” ang mga biktima ug posible nga nataymingan ra gyud nga sa ilang pagsud sa lugar misukol ang suspek.

Sa pagkakaron padayon ang gihimong hot pursuit operation sa kapulisan batok sa suspek. (/EIM)(BANAT NEWS)