CEBU, Philippines - Usa ka babaye ang napalgang patay sulod sa iyahang balay diha sa Sitio Kalipan, Barangay Sabang sa isla sa Olango sa miaging Lunes sa buntag.
Ang patay’ng babaye giila nga si Oliva Butalid, 30, dunay kapuyo, sumala pa nga duna kini samad dinunggaban sa iyang kalawasan dihang napalgan ni Rio Mata.
Matud ni Police Officer 1 Arnel Urtisila sa Olango Police Station nga si Rio Mata, miadto sa ilahang balay aduna kini tuyo ni Butalid.
Pagsulod ni Mata sa balay sa biktima, iyahang naabtan si Butalid nga nagkadugo ang lawas ug wala nay kinabuhi diha sa salog sa balay niini, gituohang nahitabo ang pagpanunggab nianang alas-11 sa buntag. Si Mata dali nga nangayo og tabang sa kapolisan .
Usa ka Jeremy Casio, 22, ang giingong uwahing nakit-ang miduaw sa balay sa biktima sa wala pa kini mapalging patay.
Tungod niini, usa ka hot pursuit operation ang gihimo sa kapolisan ug gidakop si Casio.
Ang kapolisan sa Olango gikatakda pang moimbestigar sa maong hitabo ug kun may kalabotan ba gyud si Casio sa kamatayon ni Butalid. (BANAT NEWS)