CEBU, Philippines - Usa ka menor de-edad ang gisikop human nakuhaan og armas samtang motan-aw unta kini og usa ka show sa Aznar Coliseum pasado alas 8:50 sa miaging gabii.
Ang 14-anyos nakuhaan og .38 kalibre nga Snub-nosed revolver nga adunay mga bala diha nga girekisa siya sa guwardiya sa dayon na unta niya’ng sulod sa coliseum.
Matud ni SPO1 Prio Lanita sa Cebu City Police Station-2 nga dali’ng gidala sa mga guwardiya ang batan-on ngadto sa kapolisan aron dili makamugna og kaguliyang sa mga tawo.
Base sa pasiuna’ng taho ang menor de-edad gituohang mikawat sa usa ka XRM nga motorsiklo (5048 IS) nga gipanag-iya ni Rogelio Capangpangan kaniadtong Agosto 8 gikan sa usa ka parking lot sa pribadong tunghaan sa Sugbo.
Ang pagpangawat nakuhaan og footage sa CCTV camera. Ang kapolisan mihimo og follow-up operations human nga miangkon ang suspetsado aron makuha pagbalik ang kinawat nga motor.
Nahibaw-an nga adunay kaso nga gipasaka batok sa maong dinakpan ug pending pa karon sa City Prosecutor’s Office.
Ang batan-on anaa pa karon gitanggong sa CCPO station-2. Kon masuta nga siya nagpanuigon pa og 14-anyos dili gihapon siya mapasakaan og kaso tungod sa Juvenile Law. (BANAT NEWS)