CEBU, Philippines - Usa ka 74-anyos nga lalaki gipusil patay sa wala mailhing kriminal niadtong Martes sa gabii sa lungsod sa Samboan.
Patay na nga naabtan sa iyang anak diha sulod sa iyahang balay si Marcelo Luzano Dinaunao, taga Sitio Taganas, Barangay Camburoy, Samboan human kini pusila sa wala mailhing lalaki.
Naabtan ang biktima nga nagbuy-od ug may samad pinusilan. Wala na kini makaabot nga buhi sa Samboan Municipal Health Center.
Si PO1 Hiramis Sergeberth mibutyag nga si Marcelo gikan sa iyang umahan ug pagsulod sa balay gipusil kini sa wala mailhing tawo.
Ang anak nga babaye sa biktima mibutyag sa mga polis nga nakadawat sila og pagpanghulga sa milabay’ng buwan gikan sa kapuyo sa 14-anyos nga apo sa biktima tungod kay wala kini mauyoni sa ilang pamilya. (BANAT NEWS)