CEBU, Philippines - Ang 78-anyos na nga taytayan sa Barangay Opao, dakbayan sa Mandaue giplanohan nga palapdan sa mga opisyal aron takus kini nga kaagian og mga dagko ug bug-at nga mga sakyanan.
Ang mao nga taytayan gikataho nga nahimo kaniadto pa’ng 1936 ug angay g’yud unta nga ipreserbar apan tungod sa panginahanglan, palapdan kini aron kapahimuslan sa kadaghanan.
Si Opao barangay kapitan Liza Ouano Icalina miingon nga ang P1.5 milyones nga kantidad nga gamiton sa pagpalapad sa taytayan kuhaon kini gikan sa probinsya sa Sugbo nga ihatag ni Gobernador Hilario Davide III.
Mentras tanto nga wala pa mapalapdi ang taytayan, ang mga opisyal sa Barangay Opao mihimo na daan og pagpangandam pinaagi sa paghimo og ordinansa nga mosilot sa mga motorista nga mohunong 20 metros ang gilay-on ug ingon man taliwala g’yud sa taytayan.
Nabantayan sa mga opisyal sa barangay nga pagka karon daghang mga sakyanan, apil ang mga traysikol, magpataka lang og hunong bisan diha sa taytayan. (Rene U. Borromeo)
Si Barangay Konsehal Andreo Icalina nga maoy misugyot sa ordinansa miingon nga nagkinahanglan na gayud ang pagpalapad sa taytayan tungod kay dagko na man ang sakyanan nga moagi karong panahona ug kuyaw na kini nga mahugno.
Matud ni Konsehal Icalina nga gikonsulta na niya daan ang kadagkoan sa Traffic Enforcement Agency of Mandaue (TEAM) kabahin sa iyang ordinansahon ug ila kini’ng giuyonan.
Apil sa gisugyot sa public hearing mao ang pagbutang og speed limit sa dagan sa mga sakyanan nga molabay sa mga dalan sa Barangay Opao sanglit usa kini sa mga hinungdan sa mahitabong aksidente ug ang pag-atbangay og parking sa mga sakyanan sa kadalanan. (BANAT NEWS)