CEBU, Philippines - Naangol ang usa ka sakop sa Cebu City Traffic Operations Management (CITOM) human gidasmagan og sakyanan sa eskina Colon ug P. Lopez, dakbayan sa Sugbo kagahapon sa buntag.
Ang biktima naila nga si Joseline Navecilla, 41, taga Tisa, usa ka jay-walking enforcer nga nadestino sa may dalan Colon.
Ang drayber sa delivery van sa usa ka bakeshop nga nakadasmag gimaneho sa usa ka Noel Camocamo, 24, taga Bohol.
Matud ni Joy Tumulak, operations chief sa CITOM, nga nahinabi sa Banat News nga gusto unta nga motabok sa pikas nga habig sa karsada si Navecilla aron dakpon ang usa ka tawo nga nakahimo og jay walking apan nabanggaan na hinoon og sakyanan.
Maayong pagka-bunal sa biktima sa karsada ug daling gidala sa Cebu City Medical Center (CCMC) gumikan sa bun-og sa iyang abaga ug ulo.
Imbestigaron pa ang maong insidente nunot sa pangangkon sa drayber nga go signal ang traffic light samtang ang enforcer mi-insister nga stop signal atol sa iyang paglabang.
Subling nipahimangno si Tumulak sa mga enforcers nga magbantay kanunay sa ilang trabaho aron paglikay sa disgrasya.
Bag-o lang nga dunay enforcer nga nadasmagan patay sa Banilad.
Kasamtangang gikuha sa CITOM ang driver’s license sa drayber kinsa gibuhian una samtang nagpaabot nga mopasaka og kaso ang pamilya sa biktima. (/GMR)(BANAT NEWS)