CEBU, Philippines - Ipa-regulate na sa kabarangayan sa dakbayan sa Talisay ang mga traysikad kay naghatag kini og kasamok sa trapiko.
Ang hepe sa City of Talisay-Traffic Operation Development Authority (CT-TODA), Mario Zafra, miingon nga angay badlungon ang mga traysikad nga molahos sa main road ilabi na sa Tabunok.
May mga traysikad usab nga magpataka lang og parada ug nakahatag og kasamok sa trapiko.
Matud ni Zafra nga kuwang ang iyang traffic personnel hinungdang nagkinahanglan siya og tabang sa mga barangay tanod.
Gibana-banang 400 ka mga traysikad ang magbiyahian sa Tabunok sumala pa ni Zafra.
Gikan sa nagkalain-laing barangay ang mga traysikad samtang giingong may mga gikan sa Inayawan, dakbayan sa Sugbo.
Maghuot ang trapiko sa Tabunok atol sa “peak hours” diin mag-abot ang mga sakyanan sa maong lugar.
Ang mga traysikad nga magpataka og parada ug mga traysikol nga magpundo daplin sa karsada nga maghuwat og pasahero ang makadugang sa kahuot sa trapiko.
Subay niini, si Bise Mayor Romeo Villarante nagkanayon nga dunay mga oras nga gihatag nga did-an ang mga traysikad nga makasulod sa Tabunok aron dili maghuot ang trapiko ug malikayan usab ang disgrasya. (BANAT NEWS)