Pagdala mo’g payong panagana sa uwan

CEBU, Philippines - Ang bagyong Neuguri sa Weather Bulletin mga alas 10:00 sa buntag kagahapon nahimutang kini sa 1,320 kilometros sa sidlakang- amihanan nga bahin sa Virac, Catanduanes.

Ang nahisgutang bagyo aduna kini hangin nga ang gikusgon 130 kilometros matag takna ug 160 kilometros matag oras nga unos.

Matud sa mga weather forecaster nga ang bagyo’ng Neuguri mag-irog kini sa kasadpang- habagatan nga bahin sa gikusgon nga 125 kilometros matag oras.

Si Joey Figuracion, weather specialist sa PAGASA-Mactan, nagkanayon nga gibana-bana nila nga sayo sa buntag karong adlawa mosulod na sa Philippine Area of Responsibility (PAR) si Neuguri.

Ang maong bagyo kun makasulod na sa Pilipinas nganlan kini og “Florita.” Matud ni Figuracion nga si Florita maoy ikalima’ng bagyo nga misulod sa nasud niini’ng tuiga.

Matud ni Figuracion nga si Florita dili kini makaapekto sa bisan asang parti sa nasud apan gituohan nga makapakusog sa hangin nga habagat.

Karong adlawa hangtud ugma gibana-bana nga makasinati kita og subsob nga pag-uwan sa mga dapit sa Visayas area ug ang atong kadagatan grabe nga pagkabaluron nga peligro sa gagmay’ng mga sakyanan. Dugang ni Figuracion nga si Florita dili g’yud mo-landfall og moagi lang kini sa Philippine Sea sa dili pa mobiya paingon sa Japan.  (BANAT NEWS)

Show comments