CEBU, Philippines - Gipadakop sa usa ka babaye ang iyang kapuyo tungod sa pagkulata niini kaniya diha sa Sitio San Vicente Ferrer, Barangay Tabok, Dakbayan sa Mandaue. Ang gipadakop mao si Roberto Dela Cruz Jr., 27, ang nagpadakop kaniya mao si Ely Jean Biñas, 25, nga pulos nagpuyo sa maong dapit. Si Dela Cruz gidakop sa mga barangay tanod sa Tabok nga sila si Julius Fabroa, Eugenio Judilla Jr., Archie Suquib, Ernesto Perez ug Allan Jose Sedillo nga pulos nagpuyo sa maong dapit. Matud pa ni Fabroa nga nagkalalis ang biktima ug suspetsado sa sulod sa ilang panimalay nga miresulta sa pagpangulata.Ang suspek nga giingong nakainom wa magtagad sa mga tanod ug dihang ilaha na unta kining dad-on nanghagit kini og away. Ang suspek nagpositibo sa liquor test ug gipaabot pa kung kasohan kini sa biktima. (BANAT NEWS)