CEBU, Philippines - Duha ka anggulo ang gisubay karon sa kapolisan sa dakbayan sa Lapu-Lapu kalabot sa pagbanhig patay sa usa ka empleyado sa City Treasurer’s office sa milabay’ng adlaw.
Matud pa ni Lapu-Lapu City officer-in charge Senior Superintendent Armando Radoc padayon ang mga imbestigador sa pagpanghipos og mga impormasyon sa posibleng pag-ila sa duha ka mga mamumuno nga mibanhig patay ni Shirali Jumao-as Basan diha sa Sitio Mantawi, Barangay Poblacion dakbayan sa Lapu-Lapu.
Bisan pa sa kakulang sa kooperasyon ni Rose Basan, ang asawa sa biktima, apan ipadayon gihapon sa LCPO ang imbestigasyon.
Usa sa mga anggulo nga gisubay mao ang personal nga panagbangi kalabot sa dakong utang niini sa usa ka tawo diin base sa impormasyon mag-adtoan ang biktima sa Casino.
Laing anggulo mao ang "love triangle" tungod kay dunay nadawat nga impormasyon ang kapolisan nga duna kini nakarelasyon nga laing babaye.
Apan ang tanan gisubay pa sa kapolisan aron masulbad ang maong kaso ug usa niini mao ang pagkuha sa tanang kopya sa closed circuit television (CCTV) camera sa Mactan Electric Company o MECO diin maoy katapusan niini gibisita sa wala pa kini banhigi sa duha ka mga lalaking luwan og usa ka motorsiklo.
Nanghimaut si Radoc nga dunay nakuha ang cctv camera sa MECO sa mamumuno. (BANAT NEWS)