CEBU, Philippines - Pito ka mga rice retailers sa National Food Authority (NFA-7) ang nalangkatan sa ilang mga accreditation tungod sa paglapas sa lagda sa NFA sugod niadtong bulan sa Mayo ning tuiga.
Kini human usab aprobahi sa nasudnong buhatan sa NFA ang hingpit nga pagkansela sa accreditation sa naasoy nga mga retailers tungod sa maong kalapasan. Ang buhatan ni NFA-7 regional director Atty. Danilo Bonabon pinaagi sa tigpamaba niini nga si Ma. Luicia Rosales miingon nga ang pito ka mga retailers napamatud-an sa ilang monitoring team nga wala namutang og karatola sa ilang tindahan nga nagbaligya sila og NFA rice.
Ang maong mga retailers nagagikan sa Carbon Public Market sa siyudad sa Sugbo, sa merkadohan sa siyudad sa Mandaue, siyudad sa Carcar ingon man usab sa lungsod sa Compostela.
Si Rosales miingon nga naigo sa ilang "one strike policy" ang rice retailers diin bisan kausa pa sila nakahimo og kalapasan awtomatiko silang tangtangan og accreditation. Ang NFA padayong naniid sa mga NFA rice retailers nga maoy kadaganan sa mga kabus tungod sa taas nga presyo sa mga commercial rice sa kamerkadohan karon.
Gawas sa Cebu, ang nasudnong buhatan sa NFA nipahibawo usab nga may laing 375 pa ka mga NFA retailers sa ubang probinsya ang nasakpan nga nilapas gihapon sa lagda sa NFA nga padayon pang gipaubos sa makuting pakisusi sa dili pa kini pamultahon o kaha langkatan sa ilang accreditation. -/EIM (BANAT NEWS)