CEBU, Philippines - Nadakpan sa buy-bust operation ang usa ka negosyante og sakyanan kuyog sa iyang bata-bata sa Hernan Cortes Avenue, Banilad, Dakbayan sa Mandaue alas 12 pasado sa tungang gabii niadtong Huwebes.
Ang nadakpan mao si Richard Tan Go, 42, taga San Antonio Village, Apas, Dakbayan sa Sugbo ug nasakmit gikan kaniya ang tulo ka dagku ug unom ka gagmay nga pakete sa shabu, ug ang electronic nga timbangan nakuha gikan sa bata-bata niini nga si Junrey Bacalla, 21, taga Mambaling, Dakbayan sa Sugbo.
Si Senior Insp. Joselito Ligan, hepe sa City Intelligence Branch (CIB) ug mga sakop sa City Anti Illegal Drug Special Operation Task Group (CAIDSOTG) sa Mandaue City Police Office (MCPO) ang nakadakop sa mga suspetsado.
Ang maong negosyante luwan sa iyang sakyanan nga nagdala sa plate number YAV 300 ug gipasulod pa sa suspetsado ang police decoy sa gi-parkingan niini ug didto gihimo ang transaksyon sa pagpalit og shabu.
Matud pa ni Ligan nga dihang positibo ang ilang pagpaniid sa ilegal nga kalihukan sa negosyante, ilang gihimo ang pagpasiugda og buy-bust operation.
Ilang police decoy ang nipalit og tulo ka dagkong pakete sa shabu bugti sa P43,000 nga bodol money nga gipaibabwan lang og duha ka tinuod nga P1,000 nga salapi. Si Ligan miingon nga si Go level 3 drug pusher sa Metro Cebu ug gibana-banang mohalin og 25 ka gramos nga shabu sa matag semana.
Sa laing buy-bust operation, nadakpan sila si Aldrin Ouano, 27, taga Sitio Cumpang, Yati, Liloan ug Aljun Quindao, 24, taga Basak, Dakbayan sa Mandaue.
Ang team ni Chief Insp. Jimmy Aguisanda, hepe sa Presinto 1 sa MCPO maoy nagpahigayon sa buy-bust operation ug maoy gihimong police decoy ang duha niini ka mga sakop nga sila si PO1 Rhogen Sequiño ug PO1 Nicanor Ferrolino.
Gihimo ang buy-bust operation sa New Mandaue City Public Market sa sitio Tribunal, Centro sa maong dakbayan alas 12 sa udto niadtong Huwebes.
Si Ouano nakuhaan og tulo ka gagmay’ng pakete nga gituohang shabu ug duha usab ka gagmay nga pakete ang nasakmit gikan kang Quindao nga maoy hinungdan sa ilang pagkasikop. (/GMR)(BANAT NEWS)