CEBU, Philippines - Daw naibtan karon og tunok ang polis nga nadestino sa Tabuelan Police nga maoy gidudahang mi-salvage sa usa ka gipasanginlang carnapper, kini human gipakawalay sala na sa City Intelligence Branch (CIB) sa Cebu City Police Office kay way nakitang igong basehan nga magtumbok kaniya.
Ang biktima nga si Albert Aninipok nga gigapos, gisulod og sako ug plastic bag dayon gipaigo sud sa usa ka maleta nga gilabay sa Sitio Mawmawan sa Barangay Babag ning dakbayan sa Sugbo sa nakalabay nga bulan.
Si Superintendent Romeo Santander nga nahinabi sa mga tigbalita kagahapon sa buntag miingon nga wala silay nakitang kapasikaran nga magkonektar sa maong polis sa kamatayon ni Aninipok.
Apan duna karoy duha ka mga tawo nga gi-monitor karon ang kapulisan nga daku ang posibilidad nga maoy responsable sa maong panghitabo nga gituohang nasuko sa biktima tungod sa wala matarong nga bahinay sa ilang kita sa maong ilegal nga kalihokan.
Sumala pang Santander, ang nakuhang mga pakete sa drugas sa bulsa sa biktima usa lang ka taktika aron drugas ang pasanginlan nga motibo sa pagpatay.
Giangkon sa inahan ni Albert nga si Macaria nga nalambigit sa ilegal nga kalihokan ang iyang anak sama sa pagpangarnap og motor. - /EIM (BANAT NEWS)