CEBU, Philippines - Patay ang usa ka traysikol drayber human dunggaba makadaghan ka higayun samtang natulog tupad sa iyang kapuyo sa Barangay Looc, dakbayan sa Danao niadtong Lunes sa gabii.
Ang biktima mao si Freddie Galo Cuso, 47, samtang gitumbok nga suspek mao si Jerry Patria Ferrer, 46, mag-uuma, taga Barangay Masaba sa maong dakbayan.
Si SPO1 Arestio Espina sa Danao Police Station nga nahinabi sa Banat News miingon nga natulog ang biktima nga nagdulog sa iyang kapuyo dihang gisaka sa suspetsado ug gidunggab ang kalawasan sa makadaghang higayon ginamit ang screw driver.
Matud ni Espina nga ang kapuyo nga nahigmata daling nakabangon ug nikataril og dagan paingon sa gawas sa ilang panimalay ug nangayo’g panabang sa mga silingan.
Human sa pagpatay, nagdali paggawas ang suspetsado ug mitahan sa kapolisan uban sa hinagiban nga gigamit sa pagpatay sa biktima.
Si Espina miingon nga dili pa nila matataw ang hinungdan sa kasuko sa suspetsado ngadto sa biktima tungod kay dili pa man kini motubag sa pagsukitsukit nga ilang gihimo.
Ang kapuyo sa biktima nga maoy nakasaksi sa hitabo dili pa usab ikasulti sa kapolisan tungod kay giingong nagkurog pa kini sa kahadlok. (/GMR)(BANAT NEWS)