CEBU, Philippines - Gimando sa Local School Board sa dakbayan sa Sugbo nga pabutangan na gyud og mga fire exits ang mga tunghaan dinhi sa dakbayan sa Sugbo sama sa City Central School, Abellana National High School, Guadalupe Elementary School, Lahug Elementary School ug uban pang mga tunghaan nga tag-as ang estraktura aron dunay kaagian ang mga estudyante panahon sa sunog ug uban pa nga kalamidad.
Matud ni Atty. Jose Daluz III, pangulo sa Local School Board nga sugdan sunod semana ang pagbutang og mga fire exits ug unahon ang mga tunghaan nga dunay tulo pataas nga andana.
Dugang pa ni Daluz nga daan nang gigahinan og P100 milyones gikan sa general fund ang mga pansayan, koral ug fire exits sa mga tunghaan apan gigamit kini sa pagtukod og mga building. Karung higayuna, si Mayor Michael Rama mimando nga siguruhon na gyud nga dunay mga fire exits ang mga tunghaan gikan sa gigahin nga P22 milyones sa siyudad.
Gibanabana nga duha ka semana kini mahuman tungod kay siyam ngadto sa napulo ka mga contractors ang motrabaho. (BANAT NEWS)