CEBU, Philippines - Naangol ang usa ka babaye nga gitigbas sa laing babaye nga iyang silingan diha sa Sitio Toril, Barangay Tingub, Dakbayan sa Mandaue alas-12 pasado ang takna kagahapon sa udto. Ang hinungdan, hayhayan.
Si PO1 Glenn Alcoseba sa kapolisan sa Presinto 4 sa Mandaue City Police Office (MCPO) miila sa biktima nga mao si Viviana Cortes, 41, ug ang nagtigbas mao si Michelle Rodrigo, 31, pulos minyo ug nagpuyo sa maong dapit.
Matud pa ni PO1 Alcoseba nga nasuko ang suspetsado ngadto sa biktima tungod kay gihigot man ang pisi nga gihimo niining hayhayan ngadto sa koral sa ilang panimalay nga makaingon unya sa pagkahapla sa maong koral.
Si Alcoseba miingon nga gisultihan ni Rodrigo si Cortes sa pagtangtang sa maong hayhayan apan nanga-tarungan ang biktima nga ang iyang bana maoy naghigot niini ug nagdumili usab siya sa pagtangtang niini.
Tungod niini, ang suspetsado gikatahong misamot og kasuko dali kining mikuha og sundang sa sulod sa ilang panimalay ug sa pagbalik ug gawas dali niining gihamagan ang biktima ug diretsong gitigbas ang biktima. Ang biktima nagkabuang sa pagpanagang sa sundang hinungdan nga nakaangkon kini og daghang mga samad sa iyang kamot ug bukton ug suwerte kay dali usab nga nakalipot sa luyo sa suspetsado ang bana sa biktima ug nakahigayon kini sa pag-ilog sa sundang nga dala niini.
Dali nga gidala ang biktima sa Mandaue City Hospital ug ang suspetsado nga nadakpan gibalhog karon sa sulod sa ilang detention cell ug gikatakdang pasakaan og kasong frustrated murder karong adlawa. (/EIM)(BANAT NEWS)