CEBU, Philippines - Mga suspek nga kaniadto nadakpan tungod sa pagpamutang og skimming devices sa mga automated teller machines maoy gidudahang nagpaluyo na usab niining subling pagsiaw niini sa Sugbo.
Kini maoy gibutyag sa hepe sa Criminal Investigation Branch CIB sa CCPO nga si Chief Inspector Romeo Santander.
Upat ka tuig na ang milabay dihang napulo ka mga tawo ang ilang nadakpan tungod sa maong modus operandi, apan nakapiyansa sila sa maong kaso.
Ang Regional Intelligence Division mimando na sa CIB nga subayon ug pangitaon pagbalik ang maong grupo.
Ang kapolisan nakig- alayon na sa mga hotels ug mga pension houses nga sagad maoy puy-an sa maong grupo aron magplano sa ilang buhaton ug mohimo sa ilang mga cloned ATM cards.
Apan hangtod karon wala nay nadugang nga nabiktima nga miduol sa ilang buhatan human sa usa ka insidente sa sud sa usa ka pribadong tambalanan ning dakbayan nga nangabiktima ang mga nigamit sa ATM. (/EIM)(BANAT NEWS)